С.Жапаров: Шайлоонун жыйынтыгын бурмалоого жол берилбейт
КРнын Президенти Садыр Жапаров, Жогорку Кеңештин депутаттарын шайлоодо жубайы Айгүл Жапарова менен бирге добуш берди.
Добуш берүү процедурасы аяктагандан кийин Президент ЖМК үчүн билдирүү жасап, анда шайлоодогу добуш берүү процесси толугу менен автоматташтырылганын баса белгиледи. Башкача айтканда, мурдагыдай болуп, шайлоонун жыйынтыгын бурмалоого алып келиши мүмкүн болгон адам факторунун кийлигишүүсүнө жол берилбейт.
“Эсиңиздерде болсо, мурда бюллетендерди таштоолор жана шайлоо процессине башка кийлигишүүлөр болгон. Азыр андай жок жана болбойт. Мындан тышкары, шайлоочулар эгерде мүмкүнчүлүгү жок болсо, мисалы, Алайга, Ала-Букага, Чаткалга же Ат-Башыга барбай эле, эң жакын шайлоо участогунда добуш бере алышат”, - деди Садыр Жапаров.
Мамлекет башчысы кыргызстандыктарга кайрылып, кийинки шайлоолордо да заманбап технологиялар колдонулаарын, алар мындан ары да жакшыртыла берерин белгиледи.
"Азыр “Түндүк” тиркемесиндеги санариптик паспорт менен да добуш берүүгө болот. Процедура толугу менен автоматташтырылган, мен азыр 5 мүнөттүн ичинде биометрикалык каттоодон өтүп, добуш бердим. Шайлоо процессине эч кандай кийлигишүү болушу мүмкүн эмес. Шайлоочуларды сатып алуу маселеси гана калууда. Бирок, тиешелүү органдар мындай аракеттерге ыкчам жооп кайтарышат”, - деди мамлекет башчы.
Ал ошондой эле чет өлкөлөрдөгү шайлоо тилкелерине көңүл бурду. Кыргызстандын жарандарынын шайлоо укуктарын ишке ашыруу үчүн өлкө тышында 100гө жакын, анын ичинде АКШ, Россияда, Казакстанда, Европа өлкөлөрүндө участоктор ачылган.
