Кыргызстан менен Азербайжан кызматташтыкты жаңы деңгээлге чыгарууда
Министрлер Кабинетинин орун басары – Суу ресурстары, айыл чарба жана кайра иштетүү өнөр жайы министри Бакыт Төрөбаев Кыргызстан–Азербайжан өкмөттөр аралык комиссиясынын жыйынына катышуу үчүн Бакуга барып, Азербайжан Президенти Ильхам Алиев менен жолугушту. Бул тууралуу Өкмөттүн басма сөз кызматынан билдирди.
Жолугушууда Төрөбаев Кыргызстандын Президенти Садыр Жапаровдун саламын жеткирип, акыркы жылдары эки өлкөнүн мамилелеринин жогорку деңгээлдеги ишенимдүү диалогдун негизинде стратегиялык деңгээлге көтөрүлгөнүн белгиледи. Ильхам Алиев да жылуу саламын билдирип, кыргыз-азербайжан мамилелеринин динамикалуу өнүгүп жатканын жана стратегиялык өнөктөштүктү бекемдөөгө өзгөчө маани берерин баса айтты.
Тараптар Борбор Азия менен Түштүк Кавказдын аймактарынын байланышын чыңдоого, туруктуу транспорт коридорлорун өнүктүрүүгө, экономикалык жана гуманитардык байланыштарды тереңдетүүгө мүмкүнчүлүктөрдү талкуулашты. Өзгөчө инвестициялык кызматташтык, анын ичинде Азербайжан–Кыргыз өнүктүрүү фонду аркылуу Кыргызстанда жүргүзүлүп жаткан долбоорлорду колдоо маселелери каралды.
Сүйлөшүүдө ошондой эле энергетика, транспорт жана логистика, өз ара инвестиция, билим берүү, гуманитардык алмашуу жана айыл чарба тармагындагы кызматташтыкты тереңдетүүнүн келечеги талкууланды.
