Кыргызстан менен Азербайжан космос тармагында кызматташуунун келечегин талкуулады
КРнын Министрлер Кабинетинин Төрагасынын орун басары — Суу ресурстары, айыл чарба жана кайра иштетүү өнөр жайы министри Бакыт Төрөбаев Азербайжан Республикасына болгон жумуш сапарынын алкагында “Азеркосмос” космостук агенттигине барды. Бул тууралуу Өкмөттүн басма сөз кызматынан билдиришти.
Анда министр агенттиктин директорлор кеңешинин төрагасынын милдетин аткаруучу Дунай Бадирханов менен жолугуп, космостук технологиялар, спутниктик байланыштар жана санариптик чечимдер чөйрөсүндөгү кызматташуунун келечегин талкуулады.
Кыргыз тарап азербайжан спутниктеринин мүмкүнчүлүктөрүн байланыш, өзгөчө кырдаалдардын алдын алуу, айыл чарба мониторинги жана айлана-чөйрөнү көзөмөлдөө үчүн колдонууга кызыкдар экенин билдирди. Заманбап спутниктик маалыматтар мамлекеттик башкаруунун натыйжалуулугун жогорулатууга жана маанилүү социалдык-экономикалык долбоорлорду ишке ашырууга мүмкүндүк берери айтылды.
Азербайжан тарап өз спутниктик системаларынын техникалык потенциалын, маалыматтарды берүү мүмкүнчүлүктөрүн, жогорку тактыктагы аймактык мониторингди жана мамлекеттик органдар менен жеке сектор үчүн комплекстүү санариптик кызматтарды көрсөтүүдөгү тажрыйбасын бөлүштү.
Сүйлөшүүнүн жыйынтыгында тараптар жумушчу консультацияларды улантууну жана Кыргызстан үчүн негизги тармактарда спутниктик кызматтарды жана технологияларды ишке ашырууга багытталган далилдүү долбоорлорду иштеп чыгууну макулдашышты.
