"Дүйнөлүк көчмөндөр оюндарынын" брендин Кыргызстан өзүнө таандык кылып бекитти
КРнын министрлер кабинетинин төрагасы Адылбек Касымалиев “Дүйнөлүк көчмөндөр оюндары” товардык белгисине өзгөчө укуктарды мамлекеттик менчикке өткөрүп берүү аземине катышып, көчмөндөр оюндарынын негизги ролун белгиледи.
"Бүгүн биз абдан маанилүү окуяга күбө болуудабыз. Акыркы он жылдыкта Дүйнөлүк көчмөндөр оюндары этникалык маданиятты, көчмөндөр цивилизациясынын баалуулуктарын жана салттуу спортту жайылтуу боюнча эң ири глобалдык аянтчалардын бирине айланды. Бул долбоор бүгүнкү күндө Кыргызстан үчүн чыныгы улуттук бренд, мамлекетибиздин маданий дипломатиясынын флагманы жана эл аралык беделибиздин маанилүү символу”, - деп билдирди.
Касымалиев оюндар Кыргызстанда 2014, 2016 жана 2018-жылдары ийгиликтүү өтүп, дүйнөлүк коомчулуктун зор кызыгуусун жаратканын эске салды. Андан кийин Түркия (2022) жана Казакстан (2024) эстафетаны колго алып, эл аралык аренада да жогорку баага татыды. Анын айтымында 2026-жылы VI Дүйнөлүк көчмөндөр оюндары кайрадан Кыргызстанда өтөт жана Кыргызстан дүйнөнүн булуң-бурчунан келген конокторду тосуп алууга кызуу даярдык көрүлүүдө.
Адылбек Касымалиев Дүйнөлүк көчмөндөр оюндарынын пайдубалын түптөп, анын бренд катары өнүгүшүнө зор салым кошкон Асхат Акибаевдин жетишкендиктерин өзгөчө белгиледи.
"Дүйнөлүк көчмөндөр оюндарын туруктуу өнүктүрүү үчүн бардык шарттарды түзөбүз. Дүйнөлүк көчмөндөр оюндары жөн гана спорттук мелдеш эмес. Бул тынчтыктын, биримдиктин, элдердин достугунун аянтчасы, адамзаттын тарыхый тамырын сыйлаган, көп улуттарды бириктирген цивилизациялар ортосундагы көпүрө", - деп белгилеген Адылбек Касымалиев.
Анын айтымында бренддин мамлекетке өтүшү Кыргызстандын дүйнөлүк маданият жана спорт саясатында позициясын мындан ары да бекемдей турган чечим болуп саналат.
