Н.Орунтаев: "Министрликтин кызматтарындагы 3 миңге жакын кызматкер бюджеттен маяна албай иштейт..."
Курулуш, архитектура жана турак жай-коммуналдык чарба министри Нурдан Орунтаев бүгүн “Кабар” агенттигинин “Элден собол” берүүсүнүн түз эфиринде министрликтеги ишке ашырылган жаңы реформалар тууралуу айтып берди.
Анын айтымында, республиканын аймагында министрликке караштуу кызматтардын 3 миңге жакын кызматкер мамлекеттик бюджеттен маяна албай, өзүн-өзү камсыздоо механизими боюнча иштеп жатат.
"Учурда министрликтин бир департаменти гана мамлекеттен маяна алып жатат. Бирок, кийинки жылдын январь айынан тарта министрликтеги бардык кызматкерлер ушул тартипке толук өтөт. Бул механизм айлык маяналарды көтөрүүгө жана коррупциялык элементтерди жоюуга жол ачат. Система эффективдүү иштеп жатат жана мындан ары да өнүктүрүлөт", -дейт ал.
Мындан сырткары, лицензия берүү жана сертификациялоо жаатында да олуттуу жылыштар болду. Эгер 2023-жылы бул багыттагы мамлекеттик төлөмдөр 450 миң сомду түзсө, 2025-жылдын жыйынтыгында 270 млн сомго жетери күтүлүүдө”,-деп белгиледи министр.
Муну менен катар ал министрликтин кызмат көрсөтүү тармагында дагы олуттуу өзгөрүүлөр болгонун кошумчалады.
“Эгер мурда бул багытта болжол менен 1 млрд сом чогултулса, азыр бул сумма 2,5 млрд сомго жетти. Жыйналган каражаттын эсебинен министрликтин техникалык базасы жаңыртылды, кызматкерлердин айлык маянасы жогорулады жана кызмат көрсөтүүнүн сапаты да кыйла жакшырды. Ошондой эле Корутундуларды чыгаруу департаментинде бир катар өзгөртүүлөр ишке ашты. Буга чейин бардык иштер кагаз жүзүндө жүргүзүлүп келген болсо, учурда толугу менен санарип форматка өткөрүлдү. Мындан тышкары да көптөгөн маанилүү реформалар ишке ашырылды”,-деп кошумчалады ал.
