Инвестициялар боюнча улуттук агенттиктин статусу жогорулатылды
Президент Садыр Жапаров Инвестициялар боюнча улуттук агенттиктин статусун жогорулатуу жана анын ролун күчөтүүгө багытталган Жарлыкка кол койду.
Жарлык инвестицияларды тартуу жаатындагы мамлекеттик башкаруунун натыйжалуулугун жогорулатуу максатында кабыл алынды. Ага ылайык, Президентке караштуу Инвестициялар боюнча улуттук агенттиктин башчысы инвестициялык саясатка, инвестициялык долбоорлорго жана макулдашууларга байланышкан маселелер боюнча Министрлер Кабинетинин жыйналыштарына катышат.
Документ менен Улуттук агенттиктин жетекчисинин мамлекеттик кызматтагы макамы жогорулатылып, ал Президентке караштуу мамлекеттик органдын жетекчиси катары белгиленди. Ошондой эле агенттиктин ишин борборлоштурулган тартипте координациялоо, инвестициялык макулдашууларды жана мамлекеттик-жеке өнөктөштүк долбоорлорун иштеп чыгуу, макулдашуу жана алардын аткарылышына мониторинг жүргүзүү милдеттери такталды.
Мындан тышкары, Улуттук агенттиктин башчысы Президент тарабынан дайындалып жана бошотулары, ал эми анын орун басарлары Министрлер Кабинетинин Төрагасы тарабынан дайындалары белгиленди. Агенттиктин жетекчилигиндеги кызмат орундар саясий мамлекеттик кызмат орундарына кирет.
Министрлер Кабинетине эки айлык мөөнөттө өз чечимдерин аталган Жарлыкка ылайык келтирүү жана андан келип чыгуучу башка чараларды көрүү тапшырылды.
