Садыр Жапаров Япониянын Кыргызстандагы Элчисин кабыл алды
Президент Садыр Жапаров бүгүн, 15-декабрда, Япониянын Кыргыз Республикасындагы Атайын жана Ыйгарым укуктуу Элчиси Рюити Хиранону ишеним грамоталарын тапшыруусуна байланыштуу кабыл алды.
Мамлекет башчысы Элчини Кыргызстандагы дипломатиялык миссиясынын башталышы менен куттуктап, Япония Кыргызстан үчүн жакын дос жана маанилүү өнөктөш экенин белгиледи. Ал эки өлкөнүн ортосундагы достук жана кызматташтык мамилелер жыл сайын бекемделип жатканын баса белгиледи.
Садыр Жапаров кыргыз-япон кызматташтыгы натыйжалуу форматта өнүгүп, узак мөөнөттүү демилгелер ишке ашырылып жатканын айтты. Ошондой эле Элчинин ишмердүүлүгү эки тараптуу алакаларды тереңдетүүгө жана жаңы биргелешкен долбоорлорду ишке ашырууга өбөлгө түзөрүнө ишеним билдирди.
Өз кезегинде Элчи Рюити Хирано жылуу кабыл алуу үчүн ыраазычылык билдирип, Япония Кыргыз Республикасы менен өнөктөштүктү мындан ары да өнүктүрүүгө кызыкдар экенин белгиледи. Ал Президентке Япониянын Императору Нарухитонун жана Премьер-министринин атынан салам жолдоп, Кыргызстандын Президентин Японияга сапар менен кабыл алууга даяр экендиктерин билдирди.
