“Тамчы” финансылык инвестициялык аймагын ишке ашыруу талкууланды
Министрлер Кабинетинин Төрагасы Адылбек Касымалиевдин жетекчилиги алдында “Тамчы” атайын финансылык инвестициялык аймагы жөнүндө” мыйзамдын ишке ашырылышы боюнча жыйын болуп өттү. Бул тууралуу Өкмөттүн басма сөз кызматынан билдиришти.
Аталган мыйзам Ысык-Көл облусунда өзгөчө укуктук режимге ээ атайын инвестициялык аймакты түзүү жана англис укугун колдонуу менен талаш-тартыштарды жөнгө салуучу көз карандысыз эл аралык борборду түзүү максатында кабыл алынган. Мыйзамды ишке ашыруу үчүн Жол картасы бекитилип, тиешелүү мыйзам алдындагы актылар иштелип чыгууда.
Жыйындын жүрүшүндө мыйзамды ишке ашырууну ыкчамдатуу, жаралган маселелерди аныктоо жана аларды биргелешип чечүү жолдору талкууланып, жыйынтыгында протоколдук тапшырмалар берилди.
Ошондой эле Юстиция министри Аяз Баетов жана англис укугу боюнча консультанттар тарабынан эл аралык талаш-тартыштарды жөнгө салуучу борборду түзүү боюнча презентация сунушталды.
Белгиленгендей, “Тамчы” атайын финансылык инвестициялык аймагын түзүүнүн негизги максаты – Кыргызстандын инвестициялык жагымдуулугун жогорулатуу жана жергиликтүү жана чет өлкөлүк инвесторлор үчүн ыңгайлуу шарттарды түзүү болуп саналат.
