Кыргызстанда бирдиктүү мамлекеттик egov.kg порталы ишке кирди
Министрлер Кабинетинин Төрагасы Адылбек Касымалиев аппараттык кеңешмеде бирдиктүү мамлекеттик egov.kg порталынын расмий тааныштырды. Бул тууралуу Өкмөттүн басма сөз кызматы билдирди.
Порталды ачуу учурунда Касымалиев мамлекет менен жарандардын ачык жана айкын өз ара аракеттенүүсү, ошондой эле калкты өз убагында жана ишенимдүү маалымат менен камсыздоо маанилүүлүгүн өзгөчө белгиледи.
"Мамлекеттик органдар ачык-айкын иштеши керек. Биз калкка актуалдуу жана текшерилген маалыматты жеткирүүгө милдеттүүбүз. Социалдык тармактар жана ЖМКлар маанилүү, бирок маалыматты бурмалоо көп кездешет. Бул шартта калк менен өз ара аракеттенүүнүн негизги куралы — мамлекеттик органдардын расмий веб-сайттары болушу керек", — деди Касымалиев.
Ал мурдагы мамлекеттик веб-ресурстар витрина функциясын толук аткара албай келгенин белгилеп, бул кемчиликти жоюу үчүн масштабдуу аналитикалык иштер жүргүзүлгөнүн айтты. Натыйжада бирдиктүү мамлекеттик egov.kg порталын түзүү концепциясы иштелип чыгып, жактырылган.
Бирдиктүү портал ишке кирип, колдонуучулар үчүн жеткиликтүү экени баса белгиленди. Азыркы учурда министрликтердин жана ведомстволордун сайттарын жаңы бирдиктүү платформага этап-этабы менен өткөрүү боюнча активдүү иштер жүрүүдө. Келечекте порталга бардык мамлекеттик органдар кошулат.
Порталда министрликтердин расмий маалыматтары, негизги документтери жана байланыш баракчалары камтылган. Ыңгайлуу интерфейс жана издөө мүмкүнчүлүктөрү жарандарга керектүү мамлекеттик кызматтарды, актуалдуу маалыматтарды жана тиешелүү органдардын байланыштарын тез табууга шарт түзөт.
