Кыргызстан экономиканын өсүү темпи боюнча дүйнөдөгү алдыңкы 3 өлкөнүн катарына кирди
Бүгүн, 17-декабрда Президент Садыр Жапаров Жогорку Кеңештин VIII чакырылышынын депутаттарынын биринчи жыйынында сөз сүйлөп, өлкөнүн экономикалык өсүшү, тышкы карыздарды башкаруу жана санариптештирүү аркылуу өнүгүү мүмкүнчүлүктөрү тууралуу маалымат берди.
Садыр Жапаров сөзүндө жаңы Кыргызстанды куруу жана өлкөнү өнүктүрүү үчүн бардык бийлик бутактары биримдикте иштеши керектигин баса белгиледи. Ал экономиканын өсүү темпи дүйнөдө алдыңкы 3 өлкөнүн катарына киргенин, ички дүң продукциянын өсүү темпи 10% экенин, жыл аягына карата консолидацияланган бюджет 1,2 триллион сомго жетет деп прогноздолуп жатканын маалымдады.
Президент тышкы карыздарды башкаруудагы жетишкендиктерге токтолуп, 2020-жылдагы ички дүң продукцияга салыштырмалуу 54% болгон карыздын азыр 25%га түшүрүлгөнүн, карыздарды төлөөдө экономикалык кызыкчылыкка зыян келтирбөө стратегиясы колдонуларын белгиледи.
Мындан тышкары, Садыр Жапаров өлкөнүн алтын валюта запасынын 2020-жылдагы 2,4 миллиард доллардан бүгүнкү күндө 8,5 миллиард долларга жеткенин белгилеп, экономикалык стабилдүүлүк жана инвестициялык мүмкүнчүлүктөр тууралуу да маалымат берди.
Сөзүнүн соңунда Президент Жогорку Кеңештин депутаттарын өлкөнү өнүктүрүүдө биримдикте иштөөгө чакырып, жаңы долбоорлорду жана реформаларды өз учурунда натыйжалуу ишке ашыруунун маанилүүлүгүн белгиледи.
