Бишкекте Кытай мамлекетинин жардамы менен ветеринардык-фитосанитардык лаборатория курулат
МинКабдын 2025-жылдын 19-ноябрындагы № 1004-т тескемеси менен Кытай Эл Республикасынын Өкмөтүнө жөнөтүлө турган жооптун долбоорун жактырды. Бул кат аркылуу "Кыргыз Республикасында ветеринардык жана фитосанитардык лабораторияны куруу жана тиешелүү жабдуулар менен камсыз кылуу" долбоорун ишке ашыруу боюнча Макулдашуу таризделет.
Алмашуу катынын текстине ылайык, Кытай тарап Бишкек шаарында жалпы аянты 5 915 чарчы метрди түзгөн лабораториялык комплексти долбоорлоону жана курууну, лабораториялык жабдууларды, кеңсе эмеректерин, коопсуздук системаларын жана башка зарыл болгон жабдууларды жеткирүүнү өзүнө алат.
Каржылоо 2018-жылдын 6-июнунда кол коюлган техникалык-экономикалык кызматташуу жөнүндө макулдашуунун алкагында берилген кайтарымсыз жардам каражаттарынын эсебинен жүзөгө ашырылат.
Кыргыз тарап жер тилкесин берүүгө, айлана-чөйрөгө тийгизе турган таасирди баалоону жүргүзүүгө, курулуш аянтын даярдоого жана тазалоого, тышкы инфраструктураны (жолдор, суу менен камсыздоо, канализация, электр энергиясы, байланыш) тартууга, импорттолгон жабдууларды жана материалдарды бажы төлөмдөрүнөн жана салыктардан бошотууга, ошондой эле долбоор аяктагандан кийин лабораториянын ишин камсыздоого, техникалык тейлөөгө жана реактивдерди, чыгымдалуучу материалдарды сатып алууга милдеттенет.
МинКабдын атынан жооп катка ушул тескеме менен ыйгарым укук берилген Кыргыз Республикасынын экономика жана коммерция министри кол коёт. Долбоорду ишке ашырууга Суу ресурстары, айыл чарба жана кайра иштетүү өнөр жайы министрлиги жооптуу болот. Коштоочу иш-чаралар мурда каралган бюджеттик каражаттардын эсебинен каржыланат.
Тараптардын макулдашуусу боюнча, курулуш аяктагандан кийин объект "Кытай–Кыргыз достугунун ветеринардык, фитосанитардык жана азык-түлүк лабораториясы" деп аталат жана анда "Кытайдын жардамы" деген туруктуу логотип орнотулат. Макулдашуу эки өлкөнүн өкмөттөрүнүн ортосунда кат алмашылган күндөн тартып күчүнө кирет.
