А.Касымалиев: "Пенсия келерки жылы калкка байкаларлыктай көбөйтүлөт"
Пенсиянын реалдуу өсүшү Кыргызстандын өкмөтү үчүн маанилүү болуп саналарын жана бийлик пенсияларды индексациялоонун системалуу жана туруктуу моделин түзүүнүн үстүндө иш алып барып жатканын МинКабдын төрагасы Адылбек Касымалиев 2025-жылдын жыйынтыгын жана өзүнүн кызматындагы биринчи жылды жыйынтыктап жатып билдирди.
"Биз пенсиянын өлчөмүн инфляциянын деңгээлинен жогору көтөрөбүз, ошондо пенсиянын реалдуу өсүшү камсыз болот. Биз муну дайыма көзөмөлдөп турабыз", — деди Касымалиев.
Анын айтымында, учурда Социалдык фонд камсыздандыруу төгүмдөрүнүн чогултулушун көбөйтүү боюнча иштерди жүргүзүүдө.
"Мен буга чейин айткандай, эки-үч жылдын ичинде пенсия төлөөгө кеткен каражаттар 50 миллиард сомдон 110–119 миллиард сомго чейин өстү. Пенсия төлөөгө абдан чоң каражат жумшалып жатат. Кийинки жылы пенсиянын өлчөмү да, анын көбөйүшү да калк үчүн байкаларлык болушу үчүн аракет кылабыз. Учурда бул багытта фонд менен биргеликте иш алып барып жатабыз", — деп билдирди Министрлер Кабинетинин Төрагасы "МИР" телеканалынын суроосуна жооп берип жатып.
