Өлкө бюджети социалдык багыттан өнүктүрүү багытына өттү
Кыргызстандын бюджети социалдык сектордон - өнүктүрүү багытына өткөнүн МинКаб төрагасы Адылбек Касымалиев телеканалдарга берген маегинде билдирди.
"Республикалык бюджеттин киреше бөлүгү жыл башында 430 млрд сом деп белгиленсе, учурда бул көрсөткүч 605,5 млрд сомго жетти. Ал эми ресурстарды кошкондо бюджет 585 млрд сомдон 939 млрд сомго чейин көбөйдү",-дейт ал.
Буга улай А.Касымалиев, бюджет мурда социалдык багытта болуп, анын дээрлик жарымы социалдык секторго багытталып келсе, бүгүнкү күндө ал толук кандуу өнүктүрүү бюджети деп айтууга негиз бар экендигин айтат. Тактап айтканда, чыгашалардын 35%га жакыны реалдуу секторду өнүктүрүүгө, 23%ы социалдык тармакка багытталууда. Ошондой эле 20%дан ашыгы эмгек акы төлөөгө, 6%дан ашыгы капиталдык чыгашаларга жумшалып жатат.
"Кошумча табылган каражаттардын олуттуу бөлүгү капиталдаштырууга багытталып жатат. Өлкөдөгү эң ири банкка айланган “Элдик банкка” 64 млрд сом капиталдаштырууга салынды. Мындан тышкары, капиталдык салымдарга 50 млрд сомдон ашык каражат багытталды. Баштапкыда 10 млрд сом деп каралган каражат азыр 60 млрд сомго чейин көбөйтүлдү. Бул каражаттар негизинен инфраструктуралык жана социалдык долбоорлорду ишке ашырууга, анын ичинде мектептерди, ооруканаларды жана башка маанилүү объекттерди курууга жумшалып жатат.
Биздин негизги максат - кошумча акча каражатын кийин үзүрүн бере тургандай кылып максаттуу пайдалануу үчүн өнүктүрүүгө багыттап жатабыз”, - деп белгиледи ал.
