Венгрия-Кыргыз өнүктүрүү фонду 45 млн долларга чейин колдоо көрсөтөт
Министрлер Кабинетинин Төрагасынын биринчи орун басары Данияр Амангельдиев Венгрияга болгон жумушчу сапарынын алкагында Венгриянын тышкы экономикалык байланыштар жана тышкы иштер министри Петер Сийярто менен жолугушту. Бул тууралуу Өкмөттүн басма сөз кызматынан билдиришти.
Сүйлөшүүлөрдө тараптар 2025-жылдагы кыргыз-венгер стратегиялык өнөктөштүктүн жыйынтыгын чыгарышты жана 2026-жылы кызматташтыкты мындан ары да кеңейтүүгө умтулушарын билдиришти.
Алар жыл ичинде өткөн жолугушууларды, анын ичинде КР Президенти Садыр Жапаров менен Венгриянын Премьер-министри Виктор Орбандын май айындагы жолугушуусун, сентябрдагы жана октябрдагы стратегиялык кеңештерди, ошондой эле ноябрь айындагы экономикалык кызматташтык боюнча өкмөттөр аралык комиссиянын жыйындарын белгилешти.
Тараптар Венгрия-Кыргыз өнүктүрүү фондунун маанисин баса белгилеп, анын 45 млн АКШ долларына чейин капиталдаштыруу жолу менен Кыргызстанда иштеген венгриялык компанияларды колдоого багытталганын белгилешти.
Ошондой эле, сүйлөшүүлөрдө мамлекеттер аралык маданий-гуманитардык кызматташтык каралды. Венгриянын жогорку окуу жайларында жыл сайын 200гө чейин кыргызстандык студенттерди кабыл алуу мүмкүнчүлүгү тууралуу макулдашуу болду.
Сүйлөшүүлөрдүн аягында тараптар Россия-Украина жаңжалынын тынчтык жолу менен гана жөнгө салынышын колдогон биргелешкен позициясын ырасташты жана Европа Биримдигине мүчө мамлекеттер менен санкциялык маселелер боюнча кызматташууну улантууга даяр экендиктерин билдиришти.
