А.Касымалиев: ИДП 2025-жылы 2800 долларга жетет деп күтүлүүдө
Кыргызстандын экономикасы туруктуу өнүгүп, инвестициялык активдүүлүк жана финансылык туруктуулук чыңдалып жатат. 2024-жылдын акырына карата ИДП киши башына 2513 долларды түзгөн жана 2025-жылы 2800 долларга жетет деп күтүлүүдө. Бул тууралуу Өкмөттүн басма сөз кызматынан билдиришти.
Министрлер Кабинетинин Төрагасы Адылбек Касымалиев Жогорку Кеңештин кеңейтилген жыйынында 2024-жылга карата Министрлер Кабинетинин отчетун карап, 2025-жылдын бюджетине өзгөртүүлөрдү жана 2026-жылга республикалык бюджетти, 2027-2028-жылдарга болжолдорду талкуулады.
“2024-жылы негизги капиталга инвестиция 283,2 млрд сомго жетип, 18,1%га өстү”, — деп белгиледи ал.
МинКаб Төрагасы кошумчалагандай, акча-кредит саясаты улуттук валюта сомунун туруктуулугун сактоого багытталган. “Тышкы факторлордун, анын ичинде импорттук инфляциянын таасирине карабастан, өлкөдө макроэкономикалык туруктуулук сакталып, узак мөөнөттүү өнүгүү жана инвестицияларды тартуу үчүн жагымдуу шарттар түзүлүүдө”, — деди ал.
