Кыргызстан 2026-жылга туруктуу жана профициттүү бюджет менен кирет
Кыргызстандын 2026-жылга карата консолидацияланган бюджети профицитке ээ болуп, 843,6 млрд сом өлчөмүндө пландалды. Бюджеттик кирешелерди 1 трлн сомдон кем эмес деңгээлде чогултуу максаты коюлду. Бул тууралуу Өкмөттүн басма сөз кызматынан билдиришти.
Министрлер Кабинетинин Төрагасы Адылбек Касымалиев Жогорку Кеңештин кеңейтилген жыйынында 2026-жылга республикалык бюджет жана 2027–2028-жылдарга болжолдор тууралуу маалымат берди.
Анын айтымында, 2026-жылдын бюджети туруктуу экономикалык өнүгүүгө жана жарандардын жашоо сапатын жакшыртууга багытталган. Консолидацияланган бюджет 843,6 миллиард сом өлчөмүндө пландалып, кирешелерди 1 триллион сомдон кем эмес көлөмдө чогултуу максаты коюлган.
Социалдык тармак бюджеттин негизги артыкчылыгы бойдон калууда. Бул багытка 230,9 миллиард сом бөлүнүп, каражаттар билим берүү, саламаттыкты сактоо жана социалдык коргоо системаларын өнүктүрүүгө жумшалат.
Адылбек Касымалиев ошондой эле өлкө алдыдагы беш жылда ири жана масштабдуу өзгөрүүлөргө күбө болорун белгиледи. Мамлекет 2030-жылга чейин Улуттук өнүктүрүү программасынын алкагында стратегиялык инфраструктуралык долбоорлорду ишке ашырууну улантат.
Алардын катарында өлкөнүн энергетикалык жана транспорттук коопсуздугун камсыз кылган Камбар-Ата ГЭС-1 долбоору жана Кытай–Кыргызстан–Өзбекстан темир жолунун курулушу бар.
