МинКаб улуттук экономиканын субъекттерине кепилчилик берүү тартибин жаңыртты
Министрлер Кабинети 2025-жылдын 11-декабрындагы №799 токтомду кабыл алып, улуттук экономиканын субъекттерине кепилчилик берүү тармагындагы бир катар чечимдерге өзгөртүүлөрдү киргизди.Мамлекеттик тилдеги документтерде "кепилдик" деген термин "кепилчилик" деп алмаштырылды.
Кепилчилик Кыргыз Республикасынын юридикалык жактарга - резиденттерге МинКабдын чечими жана Жогорку Кеңештин тиешелүү комитетинин макулдашуусу аркылуу, кредит, лизинг же банктык кепилчилик боюнча милдеттенмелерди камсыз кылуу үчүн берилет.
Кепилчилик инвестор долбоорду каржылоого долбоордун жалпы наркынын кеминде 30%ы өлчөмүндө (документтик ырастоо менен) катышкан учурларды эске албаганда, инвестициялык макулдашуулар боюнча милдеттенмелерге кепилчилик берилбейт.
Ошондой эле кепилчилик боюнча арыз берүүчүгө коюлуучу талаптар да аныкталды, анын ичинде:
- мөөнөтү өтүп кеткен салык боюнча карызынын жоктугу;
- долбоорго өз салымынын кеминде 30%ды түзүшү (айрым учурларда өзгөчөлүктөр каралган);
- экономиканын, азык-түлүк коопсуздугунун жана улуттук коопсуздуктун өнүгүшү үчүн стратегиялык мааниге ээ болушу.
Кепилчилик берүү үчүн бир жолку комиссия киргизилди:
- милдеттенменин суммасы 1 млрд сомдон жогору болсо — 1%;
- милдеттенменин суммасы 1 млрд сомго чейин болсо — 2%.
Мамлекеттик үлүшү 50% жана андан жогору болгон стратегиялык маанидеги субъекттер үчүн комиссияны төлөөнү кийинкиге калтыруу каралган (келишим мөөнөтүнүн жарымына чейин, бирок 36 айдан ашпаган мөөнөткө).
Кепил берүүчүнүн кызыкчылыктарын коргоо механизмдерине:
- талашсыз (акцептсиз) эсептен чыгаруу мүмкүнчүлүгү,
- активдерди кабыл алуу,
- финансылык контролер дайындоо жана башка чаралар кирет.
Өзүнчө бөлүм — региондорду өнүктүрүү фондунун каражаттарынын эсебинен берилүүчү кепилчилик.
Мындай кепилчилик төмөнкү шарттарда берилет:
- долбоордун наркынын 50%ынан ашпаган өлчөмдө;
- наркы 30 млн сомдон 250 млн сомго чейинки долбоорлор боюнча;
- Бишкек жана Ош шаарларын кошпогондо, региондордогу субъекттер үчүн;
- субсидиардык жоопкерчилик формасында.
