Курултайдын жүрүшүндө 94 негизги объекттин ачылышына онлайн старт берилди
IV Элдик Курултайда Министрлер Кабинетинин Төрагасы Адылбек Касымалиев өлкө боюнча 94 жаңы социалдык жана өнөр жай объектин онлайн ачты.
Ал акыркы беш жылда өлкө экономикалык кризистен ийгиликтүү чыгып, туруктуу өсүшкө жеткенин белгиледи. Мамлекеттик башкарууну санариптештирүү натыйжасында бажы кирешелери 46,8 миллиард сомдон 150,2 миллиард сомго чейин өстү.
Министрлер Кабинетинин Төрагасы децентралдаштыруу, мамлекеттик-жеке өнөктөштүк, инфраструктураны модернизациялоо жана экологиялык долбоорлор боюнча жүргүзүлүп жаткан иштерге токтолду. Социалдык чөйрөдө мектептердин абалы жакшыртылып, медициналык мекемелер модернизацияланууда, турак-жай менен камсыздоо программалары кеңейүүдө.
Ачылган объекттердин 27си өнөр жай, 67си социалдык багыттагы болуп, бул долбоорлор 2025-жылы 291 социалдык объект жана 119 өндүрүш ишканасын ишке киргизүү планын аткаруунун бир бөлүгү.
Баткен облусундагы Сары-Талаа-Кызыл-Таш-Зардалы унаа жолунун 18 чакырымдык бөлүгү бүткөрүлүп, Кожешкен дарыясына 30 метрлик жаңы көпүрө курулду.
Адылбек Касымалиев Элдик Курултайдын катышуучуларына жемиштүү иштөөнү жана өлкөнүн өнүгүшү үчүн конструктивдүү диалогду каалады.
