А.Касымалиев Чүй облусундагы социалдык мекемелердин иши менен таанышты
Министрлер Кабинетинин Төрагасы Адылбек Касымалиев Чүй облусуна иш сапары менен барып, бир катар социалдык стационардык мекемелерди кыдырды. Сапардын жүрүшүндө ал мекемелердин шарттары, көрсөтүлүп жаткан кызматтар жана тургундардын социалдык абалы менен таанышты. Бул тууралуу Өкмөттүн басма сөз кызматынан билдиришти.
Алгач МинКаб Төрагасы Жайыл районундагы психоневрологиялык социалдык стационардык мекемеде болуп, анда жашаган аялдарга түзүлгөн шарттарды көрүп чыкты. Учурда мекемеде 246 аял жашап, аларга медициналык, реабилитациялык жана социалдык кызматтар көрсөтүлөт. Мекемеде кол өнөрчүлүк, дарылоо жана социалдык адаптация багытындагы бөлмөлөр иш алып барат.
Андан соң Адылбек Касымалиев Беловодск шаарындагы балдардын психоневрологиялык социалдык стационардык мекемесине барды. Бул жерде учурда 221 бала тарбияланып, медициналык жана калыбына келтирүүчү жардам алышат. Мекеменин материалдык-техникалык базасы этап-этабы менен жаңыланууда.
Иш сапарынын алкагында МинКаб Төрагасы Беловодск атайын жалпы билим берүүчү мектеп-интернатынын ишмердүүлүгү менен да таанышты. Мектепте 160 бала билим алып, алардын социалдык адаптациясына жана кесипке багыт алуусуна өзгөчө көңүл бурулат.
Социалдык объектилерди кыдыруу учурунда Адылбек Касымалиев мамлекеттик кызматкерлерди жаңы жылдык корпоративдик иш-чаралардан баш тартып, бул каражаттарды калктын социалдык аялуу катмарына багыттоого чакырды. Анын айтымында, мындай кадам коомдо социалдык тилектештикти күчөтүүгө өбөлгө түзөт.
Сапардын соңунда Министрлер Кабинетинин Төрагасы социалдык мекемелердеги балдарга жаңы жылдык белектерди тапшырып, аларга чың ден соолук, бакыт жана жаркын келечек каалады.
