"Манас" эпосунун каармандарынын ысымдарын пайдалануу тартиби бекитилди
Министрлер Кабинети "Манас" эпосунун башкы каармандарынын ысымдарын пайдалануу тартибин бекитти. Тиешелүү токтомго Министрлер Кабинетинин Төрагасы Адылбек Касымалиев кол койду.
Документтин негизги максаты — "Манас" эпосунун башкы каармандарынын ысымдарын, ошондой эле алардан түзүлгөн сөздөрдү жана сөз айкаштарын товардык белгилерде, тейлөө белгилеринде жана юридикалык жактардын аталыштарында пайдалануунун укуктук тартибин аныктоо.
Мындан тышкары, токтом каармандардын ысымдарын туура, жоопкерчиликтүү жана моралдык-этикалык нормаларга, ошондой эле мамлекеттик тилдин талаптарына ылайык пайдаланууну камсыз кылууга багытталган.
Токтомдо каармандардын ысымдарын пайдаланууга жол берилүүчү шарттар жана чектөөлөр так көрсөтүлүп, аларды туура эмес же максатка ылайыксыз колдонууга жол бербөө маселеси да каралган.
Бул чечим улуттук маданий мурастарды коргоого жана "Манас" эпосунун кадыр-баркын сактоого багытталган маанилүү кадам болуп саналат.
