АКШнын вице-президенти Мадуронун мыйзамсыз кармалышы тууралуу сын-пикирлерге жооп берди
АКШнын вице-президенти Джей Ди Вэнс АКШнын Венесуэлага каршы аракеттерине, тактап айтканда, Венесуэланын президенти Николас Мадуронун АКШ күчтөрү тарабынан кармалышына карата сын-пикирлерге жооп берди.
Чет өлкөдө жашаса эле, АКШнын сот адилеттигинен эч ким кутулуп кете албастыгын Джей Ди Вэнс X социалдык медиа платформасында билдирди.
"Анын кармалуусу "мыйзамсыз" болгонун айткан ар бир адам үчүн дагы бир маанилүү эскертүү: Мадуро АКШда бир нече наркотерроризм боюнча айыпталууда. Сен Каракастагы сарайда жашап калсаң эле АКШда баңгизат аткезчилиги үчүн жоопкерчиликтен кутулам, деп ойлобо", - деп жазган ал билдирүүсүндө.
Эске салсак, 3-январдын түнүндө Венесуэланын борбору Каракаста жардыруу болгон. Кийинчерээк Трамп АКШ ири соккуларды баштаганын жана Мадуро жубайы Силия Флорес менен кошо кармалып, өлкөдөн чыгарылып кеткендигин билдирген. АКШнын башкы прокурору Памела Бондинин айтымында, алар жакында Нью-Йорктун Түштүк районундагы сотто пайда болушат. Мадурону төрт өмүр бою эркинен ажыратуу жазасы күтүп жатат.
