JICA агенттигинин колдоосу менен Кыргызстанда 43 долбоор ишке ашырылган
Министрлер Кабинетинин Төрагасы Адылбек Касымалиев Япониянын эл аралык кызматташуу агенттигинин (JICA) Вице-президенти Йошикава Йошифуми менен жолугушуу өткөрдү.
Жолугушуунун жүрүшүндө Кыргыз Республикасы менен Япониянын ортосундагы кызматташтык түзүлгөндөн бери JICA агенттигинин колдоосу менен ишке ашырылган долбоорлор талкууланды. Анын алкагында өлкө калкынын бакубаттуулугун жогорулатууга багытталган бир катар узак мөөнөттүү демилгелер ишке ашырылганы белгиленди.
Ийгиликтүү кызматташуунун жаркын мисалы катары “Бир айыл – бир продукт” долбоору жана Япония Өкмөтүнүн стипендия программасы (JDS) көрсөтүлдү. Бул демилгелер аймактарды өнүктүрүүгө жана адам ресурстарын даярдоого олуттуу салым кошуп келет.
Мындан тышкары тараптар транспорт, саламаттыкты сактоо, энергетика жана адам ресурстарын өнүктүрүү тармактарында гранттык жана техникалык жардам көрсөтүү боюнча кол коюлган долбоорлордун ишке ашырылышынын жүрүшүн талкуулашты.
Белгилей кетсек, JICA агенттигинин жардамы менен Кыргызстанда жалпысынан 43 долбоор ишке ашырылган. Быйыл JICAнын Кыргызстандагы өкүлчүлүгүнүн ачылганына 25 жыл толууда.
