Таласта 50 үй-бүлөгө көмүр таратылды
Талас шаарында аз камсыз болгон жана ден соолугунун мүмкүнчүлүгү чектелген мүчөлөрү бар 50 үй-бүлөгө 15 тонна көмүр таратылды. Бул тууралуу Талас шаарынын мэриясы билдирди.
Маалыматка ылайык, социалдык жардам көрсөтүү үчүн шаардык бюджеттен 100 миң сом бөлүнүп, ар бир үй-бүлөгө 6 каптан көмүр берилди. Жардам алуучулардын тизмеси тиешелүү башкармалыктын маалыматы жана жарандардын арыздарынын негизинде түзүлгөн.
Мындан тышкары, шаарда күз-кыш мезгилине даярдык көрүү максатында көмүр базаларына мониторинг жүргүзүлдү. Учурда Таласта 6 көмүр базасы иштеп, Кара-Кече, Кара-Жыра, Шабыркүл, Ак-Улак жана Беш-Сары көмүрлөрү сатылууда.
Текшерүүнүн жыйынтыгында көмүрдүн баасы түзүлгөн келишимдерге ылайык сакталып, кымбаттоо катталбаганы аныкталды.
Ошондой эле тиешелүү кызматтар тарабынан отканалардын даярдыгы текшерилип, жылытуу жабдууларын коопсуз пайдалануу жана абанын булганышын алдын алуу боюнча түшүндүрүү иштери жүргүзүлдү.
