Мыйзамсыз 1 тоннадай КММ кармалды
Бишкекте күйүүчү-майлоочу материалдарды (КММ) мыйзамсыз сатууга каршы кезектеги рейд өткөрүлдү. Текшерүүлөр Профсоюзная көчөсүндө, Махатма Ганди көчөсүндө жана айланма жолдо жүргүзүлдү. Бул тууралуу Биринчи Май райондук администрациясы билдирди.
Рейдге акимияттын, Салык кызматынын, муниципалдык инспекциянын, патрулдук кызматтын жана МАБ өкүлдөрү катышты.
Текшерүүнүн жыйынтыгында:
- Милициянын патрулдук кызмат башкармалыгы тарабынан 3 миң сом өлчөмүндө административдик протокол түзүлдү;
- Биринчи Май району боюнча МСК башкармалыгы 105 миң сомго 3 протокол толтурду;
- келип чыгышы белгисиз 960 литр күйүүчү май алынып, айып короого жеткирилди.
Мэрияда белгилешкендей, сертификатталбаган КММ кооптуу болуп саналат: мындай күйүүчү майды колдонуу унаалардын бузулушуна алып келип, жол кыймылынын коопсуздугуна коркунуч жаратышы мүмкүн.
Шаар тургундарына күйүүчү майды мыйзамсыз сатылган жерлерден сатып албоо жана гана сертификатталган май куюучу жайларды колдонуу сунушталды. Мыйзамсыз сооданы аныктоо боюнча иштер улантылууда.
