Кыргызстандын ирригация тармагына эл аралык инвестициялар тартылат
Суу ресурстары, айыл чарба жана кайра иштетүү өнөр жайы министри Бакыт Төрөбаев эл аралык финансы институттарынын Кыргызстандагы өкүлдөрү жана дипломатиялык корпустун өкүлдөрү менен жолугушту. Бул тууралуу Өкмөттүн басма сөз кызматынан билдиришти.
Жолугушууда Кыргызстандын суу жана ирригация тармагын өнүктүрүү, инвестициялык муктаждыктар, кызматташуунун мүмкүн болгон багыттары жана көйгөйлөрдү чечүү жолдору талкууланды.
Эл аралык өнөктөштөр менен кызматташуунун алкагында суу ресурстарын башкаруунун заманбап ыкмалары киргизилип, сууну эсепке алууну санариптештирүү, суу инфраструктурасынын климаттык өзгөрүүлөргө туруктуулугун жогорулатуу жана сугат жерлерди суу менен камсыз кылуу жакшыртылып жатканы белгиленди.
Ошондой эле Дүйнөлүк банк, Европа реконструкциялоо жана өнүктүрүү банкы, Азия өнүктүрүү банкы, Ислам өнүктүрүү банкы жана башка эл аралык өнөктөштөр менен биргеликте ишке ашырылып жаткан долбоорлордун жүрүшү каралды.
Жыйынтыгында суу чарба тармагындагы долбоорлор өлкөнүн социалдык-экономикалык өнүгүүсүнө оң таасирин тийгизери белгиленди.
