Президент айдоочулук күбөлүк берүү тартибиндеги өзгөрүүлөрдү түшүндүрдү
Президент Садыр Жапаров жеке автомектептерде айдоочулук күбөлүктөрдү “под ключ” алуу практикасы болуп келгенин билдирди. Бул тууралуу ал Транспорт каражаттарын жана айдоочулук курамды каттоо боюнча мамлекеттик борборго ("Унаа") барган учурда билдирди.
Мамлекет башчысынын айтымында, айрым автомектептер даяр айдоочулук күбөлүк үчүн 60-70 миң сомдон 1 миң долларга чейин акча алышкан. Натыйжада 2015-2019-жылдары жеке автомектептерден окугандардын 90–95%ы экзаменден өтүп кеткен.
"Жеке автомектептерде “под ключ” деген вариант болгон. Бул баарыбызга эле жашыруун эмес. Айрымдары бардык этаптарды бүтүрүп, колуна айдоочулук күбөлүктү берип эле 60-70 миң сомдон 1 миң долларга чейин алышкан", — деди Садыр Жапаров.
Президент коррупцияга каршы иштер башталгандан кийин бул көрүнүш кескин өзгөргөнүн белгилеп, 2021-жылдан тарта экзаменден өткөндөрдүн саны 28%га чейин төмөндөгөнүн, ал эми 72%ы өтпөй калганын айтты.
Ошондой эле мамлекет башчысы 2025-жылга чейин чыккан эски үлгүдөгү айдоочулук күбөлүктөрдү жасалмалоо мүмкүн болгонун белгилеп, учурда эң акыркы үлгүдөгү, жасалмалоого мүмкүн эмес жаңы айдоочулук күбөлүктөр чыгарылганын билдирди.
"Азыр чыгарылган жаңы айдоочулук күбөлүктөр дүйнө жүзүндө алдыңкы ондукка кирет. Муну жасалмалоого мүмкүн эмес", — деп кошумчалады өлкө башчы.
