Кыргызстандын мамлекеттик башкаруу системасы эл аралык конгрессте сунушталды
Министрлер Кабинетинин Төрагасынын биринчи орун басары Данияр Амангельдиев Москвага болгон жумушчу сапарынын алкагында Россия Федерациясынын Президентинин алдындагы Эл чарба жана мамлекеттик кызмат академиясы тарабынан уюштурулган биринчи Эл аралык мамлекеттик башкаруу конгрессинин ишине катышты. Бул тууралуу Өкмөттүн басма сөз кызматынан билдиришти.
Иш-чарага Россия Федерациясынын Өкмөтүнүн жана Президентинин Администрациясынын жетекчилери, Москва шаарынын мэри, ошондой эле мамлекеттик органдардын жана эксперттик коомчулуктун өкүлдөрү катышты.
Данияр Амангельдиев өз сөзүндө мамлекеттерди кесиптик мамлекеттик кызматтын артыкчылыктары, стратегиялык пландоо, санариптештирүү жана натыйжага багыт алуу принциптери бириктирип турганын белгиледи. Ал Кыргыз Республикасы улуттук өзгөчөлүктөрдү эске алуу менен мыкты эл аралык тажрыйбаларды киргизип, ачыктыкты жана коом менен кайтарым байланыш механизмдерин өнүктүрүүгө өзгөчө көңүл бурулууда деп кошумчалады.
Конгресстин алкагында министр Президенттик академиянын ректору Алексей Комиссаров менен эки тараптуу жолугушуу өткөрүп, кадрларды даярдоо жана мамлекеттик жана муниципалдык кызматкерлердин квалификациясын жогорулатуу жаатындагы кызматташуу маселелерин, анын ичинде жетекчилер үчүн билим берүү программаларын талкуулады.
