Адылбек Касымалиев Стэнфорд университетине тапшырган кыргызстандык жигитти куттуктады
КРнын Министрлер Кабинетинин Төрагасы Адылбек Касымалиев Америка Кошмо Штаттарындагы Стэнфорд университетинде бакалавриат программасы боюнча толук гранттык окууга өткөн Амиртай Бексултанов менен жолугушту.
Министрлер Кабинетинин башчысы Амиртай Бексултановду дүйнөдөгү эң абройлуу университеттердин бирине ийгиликтүү тапшыргандыгы менен куттуктап, бул жетишкендик даярдыктын, максатка жана билимге болгон умтулуунун жогорку деңгээлинин ачык далили экенин баса белгиледи. Ал жаштардын мындай ийгиликтери өсүп келе жаткан муун үчүн шыктандыруучу мисал болуп берерин белгиледи.
“Бул Амиртайдын ата-энеси үчүн гана эмес, өлкө үчүн да сыймык. Мындай мисалдар окуучуларыбызды билимге умтулууга жана максаттарына жетүүгө шыктандырат деп эсептейм. Амиртайга чоң ийгиликтерди каалайбыз”, - деди ал.
Маектешүүнүн жүрүшүндө Министрлер Кабинетинин Төрагасы жаштардын интеллектуалдык потенциалын колдоо мамлекеттик саясаттын артыкчылыктуу багыттарынын бири экенин кошумчалады.
Жолугушуунун соңунда Министрлер Кабинетинин Төрагасы Адылбек Касымалиев окуусуна мындан аркы ийгиликтерди жана жаңы жетишкендиктерди каалап, ага эстеликке белек тапшырды.
