Касымалиев Вашингтондо: 11% өсүш жана инвестициялар 18,4%га көбөйдү
Министрлер Кабинетинин Төрагасы Адылбек Касымалиев Вашингтондо Дүйнөлүк банктын оперативдик маселелер боюнча башкаруучу директору Анна Бьерде менен сүйлөшүү өткөрдү. Жолугушуу ЭВФ жана Дүйнөлүк банк тобунун жазгы жыйындарынын алкагында өттү. Бул тууралуу Өкмөттүн Басма сөз кызматынан билдиришти.
Тараптар эки тараптуу кызматташуунун негизги багыттарын талкуулашты. Касымалиев өлкөнүн экономикасы туруктуу өсүп жатканын белгилеп, акыркы төрт жылда орточо өсүү 10,2% түзгөнүн, ал эми 2025-жылы ИДПнын өсүшү 11,1%га жеткенин билдирди.
Анын айтымында, реформалардын жыйынтыгында 2025-жылы 273 миңден ашык жаңы жумуш орундары түзүлүп, инвестициялар 18,4%га көбөйгөн.
Ошондой эле Кыргызстан эл аралык тажрыйбаларды колдонууга даяр экени, анын ичинде БАЭнин “Өкмөттүк акселераторлор” программасы жана Япониянын “Бир айыл – бир продукт” долбоору мисал катары айтылды.
Жолугушууда Камбар-Ата-1 ГЭСи сыяктуу ири энергетикалык долбоорлордун ишке ашырылышы да талкууланды. Мындан тышкары, тоолуу аймактардын экологиялык көйгөйлөрүнө көңүл бурулуп, бул багытта глобалдык каржылоо механизмин түзүү сунушталды.
Өз кезегинде Анна Бьерде Кыргызстандагы реформаларды жогору баалап, айыл чарба, жашыл энергетика жана аймактарды өнүктүрүү багытында колдоо көрсөтүүгө даяр экенин билдирди. Ал ошондой эле билим берүү жана саламаттыкты сактоо тармагындагы өзгөрүүлөрдүн маанисин белгиледи.
Жыйынтыгында тараптар кызматташууну мындан ары да кеңейтүүгө жана биргелешкен долбоорлорду ишке ашырууга кызыкдар экенин ырасташты.
