Жогорку Кеңеште кодекстерге өзгөртүү киргизүү тартиби жана эмгекти коргоо тууралуу мыйзам каралды
Жогорку Кеңештин Эмгек, саламаттык сактоо, аялдар иштери жана социалдык маселелер боюнча комитетинин жыйынында “КРнын кодекстерине өзгөртүүлөрдү киргизүүнүн мезгилдүүлүк маселелери боюнча айрым мыйзам актыларына өзгөртүүлөрдү киргизүү жөнүндө” мыйзам долбоору биринчи окууда каралып, колдоо тапты.
Жыйында баяндама жасаган юстиция министринин орун басары Айбек Айдаров мыйзам долбоору укуктук жөнгө салуунун туруктуулугун камсыз кылууга, укуктук аныксыздыкты азайтууга жана жарандардын укук системасына болгон ишенимин жогорулатууга багытталганын белгиледи.
Анын айтымында, акыркы жылдары кодекстерге тез-тез өзгөртүүлөр киргизилип, бул алардын туруктуулугуна терс таасирин тийгизүүдө. Ошондуктан мыйзам долбоорунда кодекстерге өзгөртүүлөрдү “Президенттин чечими же Конституциялык соттун чечимин аткаруу учурларын эске албаганда, жылына бир жолудан көп эмес киргизүү” сунушталууда.
Мындан тышкары, жыйында Министрлер Кабинети тарабынан демилгеленген “Эмгекти коргоо жөнүндө” мыйзам долбоору каралып, үчүнчү окууда кабыл алынды.
Бул мыйзам кызматкерлер үчүн коопсуз жана ден соолукка зыян келтирбеген эмгек шарттарын түзүүгө, өндүрүштөгү кырсыктарды жана кесиптик ооруларды алдын алууга, ошондой эле эмгекти коргоо системасынын натыйжалуулугун жогорулатууга багытталган.
