Кыргызстан–Армения: соода, инвестиция жана транспорт тармактары талкууланды
Президент Садыр Жапаров бүгүн Казакстандын Астана шаарында Армения Республикасынын Президенти Ваагн Хачатурян менен жолугушту. Бул тууралуу Президенттин Администрациясынан билдиришти.
Жолугушуунун жүрүшүндө тараптар кыргыз-армян кызматташтыгынын учурдагы абалын жана келечегин талкуулашты. Ошондой эле ЕАЭБ, ЖККУ, БУУ жана башка эл аралык уюмдардын алкагында өз ара аракеттенүү маселелерине көңүл бурулду.
Сүйлөшүүлөрдө саясий диалогду тереңдетүү, соода-экономикалык байланыштарды кеңейтүү, өндүрүштүк кооперацияны өнүктүрүү, транспорттук-логистикалык каттамдарды жакшыртуу жана маданий-гуманитардык кызматташтыкты чыңдоо багыттары каралды.
Мындан тышкары, соода, инвестиция, транспорт, санариптештирүү жана туризм тармактарында биргелешкен долбоорлорду ишке ашыруу маселелери талкууланды.
Президент Садыр Жапаров армян тарапты 2026-жылдын 31-августунан 6-сентябрына чейин Кыргызстанда өтө турган VI Дүйнөлүк көчмөндөр оюндарына активдүү катышууга чакырды.
Жолугушуунун жыйынтыгында тараптар кыргыз-армян мамилелерин мындан ары да достук, өз ара сый-урмат жана ишеним негизинде өнүктүрүүгө даяр экендиктерин билдиришти.
