Вашингтондо Дональд Трамп катышкан иш-чарада ок атылды
АКШнын борбору Вашингтон шаарында өзгөчө кырдаал катталып, ок атуу болгондугун эл аралык ЖМК жазып чыгышты. РИА Новостинин маалыматына ылайык, окуя Washington Hilton мейманканасында өтүп жаткан Ак үйдүн кабарчылар ассоциациясынын жыл сайынкы кечки жыйыны учурунда орун алган.
Ал иш-чарага АКШ президенти Дональд Трамп, анын жубайы жана жогорку кызматтагы расмий адамдар катышып жаткан. Ок атылганы тууралуу кабардан кийин президент, биринчи айым Мелания Трамп жана башка жетекчилер коопсуздук кызматкерлери тарабынан дароо эвакуацияланган.
Окуя болгон учурда айрым катышуучулар залдан шашылыш чыгып кетсе, башкалары жашынууга аракет кылышкан. АКШнын жашыруун кызматы шектүү адамды кармаганын билдирген. Ал металл издегич рамканын жанында кармалганы айтылууда.
Азырынча ок кайсы жерде так атылганы жана жабыркагандар бар-жогу тууралуу так маалымат жок. Окуя болгон жай курчоого алынып, коопсуздук чаралары күчөтүлдү.
Президент Дональд Трамп кийинчерээк социалдык тармак аркылуу билдирүү жасап, шектүү кармалганын тастыктады. Тергөөнүн жүрүшүндө ок аткан адамдын ким экендиги жана анын аракетинин себептери такталууда.
