11-майдан баштап жергиликтүү калк менен бийлик өкүлдөрүнүн жолугушуусу башталат
Облустук деңгээлдеги жетекчилер үстүбүздөгү жылдын 11-майынан тарта ар бир айыл өкмөттө жергиликтүү калк менен жолугушууларды өткөрө баштайт. Бул тууралуу Президент Садыр Жапаров өзүнүн социалдык баракчасында билдирди.
Маалыматка ылайык, анын Ош облусуна болгон иш сапарынын жүрүшүндө жети районунун тургундары менен жолугушуп жатып, эл көтөргөн маселелердин 80 % райондук, облустук деңгээлде чечиле турган маселелер экени байкалган. Ушуга ылайык, жергиликтүү бийлик менен жеринде маселелер чичилиши керектиги байтылууда.
“Калган 20 % гана мектеп, таза суу, стратегиялык маанидеги жолдорду салуу өңдүү республикалык бюджеттин колдоосун талап кылган маселелер болду. Көпчүлүгү жергиликтүү деңгээлде эле чечиле турган маселелер: социалдык жардам, үй салууга жер тилкесин берүү, документтерин калыбына келтирүү, мүлккө болгон укуктардын корголушу, “айыл өкмөт, аким, мэр укпай койду, адилетсиз камап койду” деген өңдүү ж.б. даттануулар. Эми менин тапшырмам менен облустардагы ыйгарым укуктуу өкүлдөрүм баш болуп, облустук деңгээлдеги прокуратура, ички иштер, өзгөчө кырдаалдар министрлигинин өкүлдөрү жана башка мекеме жетекчилери ушул бекитилген графикке ылайык, ар бир айыл өкмөттү кыдырып, жеринде жолугушууларды өткөрүп, элдин көйгөйлүү маселелерин карашат” – деп билдирди С. Жапаров.
Президенттин билдирүүсунө караганда, май-июнь айларындагы айыл өкмөттөрдөгү ар бир жолугушуу УТРК, ЭлТР жана облустук телеканалдар менен соцтармактар аркылуу түз алып көрсөтүлөт. Ошондой эле мындай жолугушуулар эми октябрь-ноябрда кайрадан кайталанышы күтүлөт. Ага ылайык, май-июнда жарандар көтөргөн маселелер чечилген же чечилбей калганы белгилүү болмокчу.
Жолугушууларга катышуу жана андан кабардар болуу үчүн атайын график түзүлгөн. Каалоочулар графикке көз салып, тийиштүү айыл өкмөттөгү жолугушуулардын качан, кайсыл жерде өтөрүн көрүп алуусу сунушталат.
