Садыр Жапаров ШКУ өлкөлөрүнүн коопсуздук кеңештеринин катчылары менен жолугушту
Президент Садыр Жапаров бүгүн Шанхай кызматташтык уюмуна мүчө-мамлекеттердин коопсуздук кеңештеринин катчыларынын 21-жыйынына катышуу үчүн Бишкекке келген делегация башчылары менен жолугушту.
Мамлекет башчысы жыйын ШКУнун алкагындагы коопсуздук жаатындагы 2026-жылдагы негизги окуялардын бири экенин белгилеп, аймактык жана эл аралык коопсуздук маселелерине өзгөчө көңүл бурулуп жатканын айтты.
Садыр Жапаров өз сөзүндө бүгүнкү күндө дүйнө жүзүндө геосаясий чыңалуу күчөп жатканын, Жакынкы Чыгыштагы куралдуу кагылышуулар, терроризм, экстремизм, баңгизаттарды мыйзамсыз жүгүртүү жана киберчабуулдар сыяктуу коркунучтар актуалдуу бойдон калып жатканын белгиледи.
Президент Кыргызстан эл аралык карама-каршылыктарды жөнгө салууда саясий-дипломатиялык ыкмаларды колдой турганын айтып, “эң татаал диалог да куралдуу кагылышуудан артык” экенин баса белгиледи.
Ошондой эле мамлекет башчысы “шанхай рухунун” негизги принциптери — өз ара урматтоо, ишеним жана коопсуздуктун бөлүнбөстүгү туруктуу кызматташтыктын негизи болуп саналарын айтты.
Жолугушууда атайын кызматтар ортосунда маалымат алмашууну күчөтүү, терроризмди каржылоо каналдарына бөгөт коюу жана кризистик кырдаалдарга каршы биргелешкен аракеттерди өнүктүрүү маселелери талкууланды.
Өз кезегинде ШКУга мүчө өлкөлөрдүн өкүлдөрү аймактык жана эл аралык коопсуздук боюнча пикир алышып, учурдагы коркунучтарга каршы күрөшүүдө кызматташууну күчөтүүгө даяр экенин билдиришти.
