Мамлекеттик кызматкерлер эми костюмдун ордуна улуттук кийимдин үлгүсүнө өтүшү мүмкүн
Мамлекеттик кызматкерлер үчүн күндүн ысык мезгилинде галстук жана костюмсуз иштөөгө уруксат берген токтом чыгарылды. Бул чечим, биринчиден, кызматкерлер үчүн ыңгайлуулукту камсыз кылууга, экинчиден, электр энергиясын үнөмдөөгө багытталган.
Мындай билдирүүнү, Министрлер кабинетинин төрагасы Адылбек Касымалиев бүгүн жыйындын жүрүшүндө билдирди. Анын айтымында, мындай сунуштун башкы максаты - электр энергиясын үнөмдөө болуп саналат жана бул тажрыйба Япониянын өкмөтүнө өзүнүн жакшы натыйжасын бергендиги менен белгилүү.
Төраганын пикирине караганда, костюм жана галстук менен ысыган кызматкерлер иш бөлмөлөрүндөгү кондиционерлерди максималдуу деңгээлде иштеткен учурлар көп. Анын негизинде, электр энегиясы ашыкча чыгымдалып жатат. Бирок бул - мамлекеттик кызматкерлерге кондиционерди иштетүүгө тыюу салат дегенди билдирбейт.
Ушуга байланыштуу төрага Маданият министрлигине мамлекеттик кызматкерлер үчүн улуттук элементтер камтылган форманын дизайнын иштеп чыгып, сунуштоону тапшырды.
Ага ылайык, келечекте мамлекеттик кызматкерлер улуттук кийим үлгүсүндөгү формаларды кийиши күтүлөт. Ал эми протоколдук жана эл аралык иш-чаралар белгиленген дресс-код менен, мурдагыдай эле жүргүзүлөт.
