Марлен Маматалиев ЕКПАнын баяндамачысын кабыл алды
4-июнда Жогорку Кеңештин төрагасы Марлен Маматалиев Европа кеңешинин парламенттик ассамблеясынын Кыргызстагы баяндамачысы Мариетта Караманли менен жолугушту.
Жолугушууда Кыргызстан менен Европа мамлекеттеринин ортосундагы кызматташтыкты кеңейтүү, ошондой эле Жогорку Кеңеш менен Европа кеңешинин парламенттик ассамблеясынын алакаларын өнүктүрүү маселелери талкууланды.
Марлен Маматалиев Кыргызстан Европа кеңеши менен кызматташтыкты өнүктүрүүгө кызыкдар экенин белгилеп, өлкөдө мыйзам үстөмдүгүн камсыз кылууга багытталган саясий жана институционалдык реформалар жүрүп жатканын айтты. Ошондой эле ал Жогорку Кеңеш 2014-жылдан бери ЕКПАда «Демократия үчүн өнөктөш» макамына ээ экенин эске салды.
Төрага парламенттеги соңку өзгөрүүлөргө да токтолуп, депутаттардын үчтөн биринен көбүн аялдар түзөрүн, мыйзам чыгаруу жана документ жүгүртүү иштери толугу менен электрондук форматка өткөнүн билдирди.
Мындан тышкары, шайлоочулар менен байланышты күчөтүү максатында санариптештирилген коомдук кабылдама ишке берилгенин кошумчалады.
Өз кезегинде Мариетта Караманли Европа кеңеши кыргыз парламенти менен кызматташууга өзгөчө көңүл буруп жатканын белгилеп, эки тараптуу алакаларды өнүктүрүүгө багытталган иш-чаралар активдүү уюштурулуп жатканын айтты.
Жолугушууда тараптар шайлоо жараяндарын жакшыртуу, сот системасын реформалоо, парламенттин ачык-айкындуулугун өнүктүрүү жана маданий-гуманитардык кызматташтык маселелери боюнча да пикир алышты.
