Кыргызстан туризмди жыл бою киреше алып келген тармакка айлантууну көздөйт
Кыргызстан туризмди жыл бою иштеген кирешелүү тармакка айландырууну көздөйт. Бул тууралуу өлкө башчысы 21-октябрда борбор калаада өткөн республикалык кеңешмеде билдирди.
Бул үчүн заманбап жана сапаттуу тейлөөнү камсыз кылуу, туристтик инфраструктураны өнүктүрүү жана саякатчылардын коопсуздугун камсыздоо негизги милдеттер катары белгиленди.
Садыр Жапаров бул багытта "Ала-Тоо Резорт", "Байтик Резорт" жана "Чаткал Резорт" долбоорлору ишке ашырыларын айтты.
Ошондой эле Бишкек, Ош жана Манас шаарларында, Ысык-Көлдүн жээгинде эл аралык иш-чараларды өткөрүү аркылуу бизнес-туризмди өнүктүрүү пландалууда.
Президент тоолуу аймактарда ишкердикти жаңы баштагандарга чакан бизнести өнүктүрүүнү сунуштап, сапаттуу кызмат көрсөтүүгө, улуттук ашканага, ат менен сейилдөөгө жана тоо экскурсияларын уюштурууга басым жасоо зарылдыгын белгиледи.
Мындан тышкары, Министрлер кабинетине өлкө ичинде түзүлүүчү кошумча наркты көбөйтүүгө багытталган туристтик кызмат көрсөтүүлөрдүн бирдиктүү чынжырын калыптандыруу тапшырылды.
