Садыр Жапаров: "БУУдагы жеңиш — дүйнөлүк ишенимдин белгиси"
Президент Садыр Жапаров Facebook баракчасына кайрылуу жарыялап, Кыргызстандын Бириккен Улуттар Уюмунун Коопсуздук кеңешинин 2027–2028-жылдардагы туруктуу эмес мүчөлүгүнө шайланышын “тарыхый жеңиш” деп атады.
Мамлекет башчысы 3-июнда БУУга мүчө мамлекеттердин колдоосу менен Кыргызстан эл аралык коомчулуктун жогорку ишенимине ээ болгонун белгиледи.
“Кыргызстан бул жеңишти эл аралык коомчулуктун жогорку ишеними катары, ошондой эле БУУга мүчө бардык мамлекеттердин алдындагы чоң жоопкерчилик катары кабыл алат”, — деп жазды президент.
Садыр Жапаров Кыргызстан Коопсуздук кеңешиндеги ишмердүүлүгүндө эл аралык тынчтыкты жана коопсуздукту чыңдоого, чыр-чатактарды алдын алууга, чакан өнүгүп келе жаткан мамлекеттердин ролун күчөтүүгө басым жасай турганын билдирди.
Ошондой эле ал Кыргызстандын талапкерлигин колдогон мамлекеттерге ыраазычылык айтып, Филиппинге өзгөчө ыраазычылык билдирди.
“Кыргыз Республикасы Коопсуздук кеңешинде тынчтыкка, туруктуулукка жана көп тараптуулукту бекемдөөгө кызмат кылган жоопкерчиликтүү, конструктивдүү жана ачык өнөктөш болууга даяр”, — деп белгиледи өлкө башчысы.
