Жергиликтүү башкарууну жакшыртууга багытталган мыйзам каралды
4-июнда Жогорку Кеңеште жергиликтүү мамлекеттик администрация жана жергиликтүү өз алдынча башкаруу органдары жөнүндө” мыйзамга өзгөртүүлөр биринчи окууда каралып, концепциясы жактырылды.
Документ жергиликтүү өз алдынча башкаруу системасын өркүндөтүү, айрым ченемдерди тактоо жана үй-бүлөлүк, расмий иш-чараларды тартипке келтирүүгө багытталган.
Талкуу учурунда депутаттар Улукбек Карыбек уулу жергиликтүү бийликтин жоопкерчилигин күчөтүү зарылдыгын айтса, Камила Талиева айылдарга мамлекеттик колдоону күчөтүү сунушун билдирди.
Андан тышкары, “Мамлекеттик жарандык кызмат жана муниципалдык кызмат жөнүндө” мыйзамга өзгөртүүлөрдү киргизүү тууралуу мыйзам долбоору да биринчи окууда каралып, колдоо тапты.
Мыйзам долбоорун баяндаган депутат Табылды Муратбеков белгилегендей, документтин максаты — мамлекеттик жана муниципалдык кызматтагы айрым талаптарды өркүндөтүү жана патронаттык кызмат орундарын тактоо болуп саналат.
Ага ылайык, саясий жана атайын кызмат орундарын ээлеген адамдардын жардамчылары үчүн иш тажрыйбасына байланышкан айрым квалификациялык талаптарды алып салуу сунушталууда.
\\
