Садыр Жапаров ШКУдагы коопсуздук кызматташтыгын күчөтүүгө чакырды
Президент Садыр Жапаров Шанхай кызматташтык уюмуна мүчө мамлекеттердин ички иштер жана коомдук коопсуздук министрлери менен болгон жолугушууда заманбап коркунучтарга каршы биргелешкен аракеттерди күчөтүү зарылдыгын билдирди.
Жыйында маалыматтык коопсуздук, киберкоркунучтарга каршы күрөш жана санариптик технологиялардын өнүгүшүнө байланыштуу жаңы чакырыктар талкууланды.
Мамлекет башчысы бүгүнкү күндө кылмыштуу топтор жасалма интеллектти, киберчабуулдарды жана мыйзамсыз каржы агымдарын пайдаланып жатканын белгилеп, маалыматтык коопсуздукту чыңдоо жана киберкоркунучтарга каршы күрөштү күчөтүү өзгөчө маанилүү экенин айтты.
Анын айтымында, ШКУ мейкиндигиндеги коопсуздук коркунучтар пайда болгондон кийин эмес, аларды алдын ала аныктап, бөгөт коюуга жөндөмдүү болушу керек.
“Кылмыш дүйнөсү жаңы технологияларды өздөштүрүп жаткан шартта биздин биргелешкен аракеттер дагы заман талабына жооп бериши зарыл”, — деди Садыр Жапаров.
Президент ошондой эле ШКУнун Регионалдык антитеррордук түзүмүнүн базасында Коопсуздук коркунучтарына каршы күрөшүү боюнча универсалдуу борбор түзүү сунушун белгиледи.
Анын курамында Бишкектеги Трансулуттук уюшкан кылмыштуулукка каршы күрөшүү борбору жана Ташкенттеги Маалыматтык коопсуздук борбору иш алып барышы мүмкүн экени айтылды.
Өз кезегинде Нурлан Ермекбаев Кыргызстан ШКУ алкагындагы коопсуздук маселелерине өзгөчө көңүл буруп жатканын белгилеп, Садыр Жапаровго ыраазычылык билдирди.
