Санкциялык саясат боюнча президенттин атайын өкүлү дайындалды
Президенти Садыр Жапаров “Экономика жана коммерция министрин президенттин өзгөчө тапшырмалар боюнча атайын өкүлү кылып дайындоо жөнүндө” жарлыкка кол койду.
Жарлыкка ылайык, Бакыт Сыдыков санкциялык саясат жана санкциялык тобокелдиктерди азайтуу маселелери боюнча президенттин атайын өкүлү болуп дайындалды. Ал бул кызматты экономика жана коммерция министри кызматын айкалыштыруу менен аркалайт.
Документке ылайык, Бакыт Сыдыковго 2026-жылдын 31-декабрына чейин Министрлер кабинетинин төрагасынын орун басары макамы ыйгарылды.
Жарлыктын негизги максаты — Кыргызстандын улуттук экономикалык кызыкчылыктарын коргоо, санкциялык тобокелдиктердин алдын алуу жана мамлекеттик органдардын бул багыттагы ишин бир нукка салуу болуп саналат.
Атайын өкүлдүн негизги милдеттерине төмөнкүлөр кирет:
санкциялык тобокелдиктерди алдын алуу жана азайтуу боюнча мамлекеттик органдардын ишин координациялоо;
чет мамлекеттер, эл аралык уюмдар жана финансылык мекемелер менен санкция маселелери боюнча байланыш жүргүзүү;
экинчи даражадагы санкциялардын тобокелдиктерин азайтуу;
трансчек аралык эсептешүүлөрдүн туруктуулугун камсыз кылуу;
эл аралык чектөөлөрдүн экономикага, соодага, логистикага жана банк тармагына тийгизген таасирин талдоо;
санкциялык чакырыктарды эрте аныктоо жана ыкчам чара көрүү механизмдерин иштеп чыгуу.
Мындан тышкары, атайын өкүлгө мамлекеттик органдардан маалымат талап кылуу, мекемелер аралык жыйындарды өткөрүү жана санкциялык саясат боюнча президентке жана Министрлер кабинетине сунуштарды киргизүү укугу берилди.
