Кыргыз-швейцар өнөктөштүгүнүн жаңы багыттары талкууланды
11-июнда Министрлер кабинетинин төрагасынын орун басары Эрлист Акунбеков Швейцариянын Кыргызстандагы Атайын жана ыйгарым укуктуу элчиси Сироко Мессерли менен жолугушту. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, жолугушууда тараптар суу ресурстарын башкаруу, айыл чарба жана туруктуу өнүгүү тармактарындагы кыргыз-швейцар кызматташтыгынын учурдагы абалын жана келечегин талкуулашты.
Кыргыз тарап Швейцариянын өлкөдөгү суу ресурстарын натыйжалуу пайдалануу жана башкаруу системасын жакшыртууга багытталган "Суу пайдаланууга уруксат берүү системасы (WUP KG)" долбоорун ишке ашырууга кошкон салымын жогору баалады.
Мындан тышкары, органикалык айыл чарбаны өнүктүрүү, мал чарбачылыгы, ветеринария, балык чарбачылыгы жана аквакультура багыттарындагы кызматташтык маселелери каралды.
Тараптар ошондой эле ата мекендик айыл чарба өндүрүмдөрүнүн экспорттук мүмкүнчүлүктөрүн кеңейтүүгө багытталган долбоорлорду ишке ашыруу боюнча пикир алышты.
Жолугушуунун жыйынтыгында Кыргызстан менен Швейцария агроинновациялар, климаттык туруктуулук жана айыл чарбасын санариптештирүү багыттарында өнөктөштүктү мындан ары өнүктүрүүгө кызыкдар экенин билдиришти.
