Экологиялык талаптарды аткарылбагандыгына үчүн айыл өкмөтүнө 13 000 сом айып пул салынды
Базар-Коргон районундагы Кеңеш айыл өкмөтүнүн таштанды таштоочу жайынын экологиялык паспортунун колдонуу мөөнөтү узартылган эмес, аталган айыл өкмөтүнө буга чейин регионалдык башкармалык тарабынан беш пункттан турган эскертме берилген. Бирок талаптар аткарылбагандыгына байланыштуу айыл өкмөтүнө 13 000 сом өлчөмүндө айып пул салынды.
Бул тууралуу Жаратылыш ресурстары, экология жана техникалык көзөмөл министрлигинен кабарлашты.
Билдирүүгө караганда, Жаратылыш ресурстары, экология жана техникалык көзөмөл министрлигинин Жалал-Абад регионалдык башкармалыгы тарабынан жүргүзүлгөн иш-чараларынын жүрүшүндө экологиялык талаптарды бузган фактылар аныкталып, күнөөлүү тараптарга административдик чаралар көрүлдү.
Мындан тышкары, келип түшкөн маалыматтын негизинде Сайдыкум айыл аймагына караштуу Кара-Үңкүр дарыясынын жээгинде рейддик иш-чарада жергиликтүү тургундардын бири кум-шагыл аралашмасын белгиленген эрежелерди бузуу менен казып жатканы аныкталган.
Аталган жаранга дагы Укук бузуулар жөнүндө кодексине ылайык 13 000 сом өлчөмүндө айып пул салынды. Ошондой эле кум-шагыл жана чопо кендерин казып алуунун белгиленген тартибин сактоо, мыйзам талаптарын аткаруу жана жаратылыш ресурстарын сарамжалдуу пайдалануу боюнча түшүндүрүү иштери жүргүзүлдү.
