Кыргызстан менен Кытай виза алуу маселесин талкуулашты
Бишкекте кыргыз-кытай министрликтер аралык консулдук консультациялары өтүп, эки өлкөнүн кызматташтыгынын орчундуу маселелери каралды.
Тышкы иштер министрлигинин маалыматына ылайык, делегацияларды Консулдук департаменттин директору Сейтек Жумакадыр уулу жана Кытайдын Тышкы иштер министрлигинин Консулдук департаментинин директору Лун Чжоу жетектеди.
Сүйлөшүүлөрдүн жүрүшүндө тараптар консулдук тармактагы кызматташтыкты кеңейтүү, жарандардын укуктарын коргоо жана эки өлкөнүн ортосундагы байланыштарды чыңдоо маселелерин талкуулашты.
Жолугушуунун негизги темасы Кыргызстан менен Кытайдын ортосундагы виза режимин либералдаштыруу болду. Тараптар туристтик жана ишкердик байланыштарды өнүктүрүү үчүн виза алуу жол-жоболорун жөнөкөйлөтүүнүн жана ыкчамдатуунун маанилүүлүгүн белгилешти.
Мындан тышкары, эки өлкөнүн жарандарынын жана ишканаларынын мыйзамдуу укуктарын жана кызыкчылыктарын коргоо маселелерине өзгөчө көңүл бурулду. Тараптар бул багытта кызматташууну улантууга даяр экендиктерин билдиришти.
Консультациялардын алкагында соттолгон жарандарды өткөрүп берүү маселеси да каралды. Кыргыз тарап Кытайда жаза өтөп жаткан Кыргызстандын жарандарына байланыштуу өтүнүчтөрдү кароону тездетүүнү суранды.
Ошондой эле жолугушууда эки мамлекеттин ортосундагы келишимдик-укуктук базаны кеңейтүү, консулдук кызматтарды санариптештирүү жана бул багыттагы тажрыйба алмашуу маселелери талкууланды.
