Токаевге Астанадагы көчөгө Жусуп Абдрахмановдун ысымын ыйгарууну сунушташты
Жогорку Кеңештин төрагасынын Марлен Маматалиев Казакстандын президенти Касым-Жомарт Токаев менен жолугушууда Астанадагы негизги көчөлөрдүн бирине көрүнүктүү мамлекеттик ишмер Жусуп Абдрахмановдун ысымын ыйгарууну сунуштады.
Парламенттин басма сөз кызматынын маалыматына ылайык, жолугушууда тараптар кыргыз-казак кызматташтыгынын учурдагы абалын жана келечегин талкуулашты.
Ошондой эле маданий-гуманитардык алакалар боюнча маселелер көтөрүлүп, төрага Астана шаарындагы негизги көчөлөрдүн бирине көрүнүктүү мамлекеттик ишмер Жусуп Абдрахмановдун ысымын ыйгарууну сунуш кылды.
Өз кезегинде Касым-Жомарт Токаев Кыргызстандын Казакстан үчүн жакын коңшу, бир тууган мамлекет жана ишенимдүү өнөктөш экенин белгиледи.
Ошондой эле ал Кыргызстандын акыркы жылдардагы экономикалык өнүгүүсүнө жогору баа берип, өлкөнүн Бириккен Улуттар Уюмунун Коопсуздук кеңешинин туруктуу эмес мүчөлүгүнө шайланышын Борбор Азия үчүн маанилүү окуя катары баалады.
Жолугушуунун жүрүшүндө тараптар парламенттер аралык кызматташтыкты өнүктүрүү, жогорку деңгээлде жетишилген макулдашууларды мыйзамдык жактан камсыздоо жана эки өлкөдө жүргүзүлүп жаткан социалдык-экономикалык реформалар боюнча пикир алышты.
Мындан тышкары, Кыргызстан менен Казакстандын ортосундагы стратегиялык өнөктөштүк жана союздаштык мамилелерди мындан ары да бекемдөөгө даяр экендиктерин ырасташты.
