Кыргыз тарап кытайлык ишкерлерге инвестициялык долбоорлорду сунуштады
15-июнда Кытайдын Циндао шаарында президенттин өзгөчө тапшырмалар боюнча атайын өкүлү Бакыт Төрөбаев Шаньдун провинциясынын ишкер чөйрөсүнүн өкүлдөрү менен бизнес-жолугушууга катышты. Бул тууралуу өкмөттүн басма сөз кызматы билдирди.
Жолугушууда тараптар Кыргызстан менен Кытайдын ортосундагы соода-экономикалык жана инвестициялык кызматташтыкты кеңейтүү маселелерин талкуулашты.
Бакыт Төрөбаев Кыргызстанда инвестиция тартуу жана бизнес жүргүзүү үчүн жагымдуу шарттар түзүлгөнүн белгилеп, кытайлык компанияларды биргелешкен долбоорлорго активдүү катышууга чакырды.
Иш-чаранын алкагында кыргыз тарап транспорт, энергетика, өнөр жай, айыл чарба жана социалдык инфраструктура тармактарындагы бир катар инвестициялык долбоорлорду сунуштады.
Жолугушуунун жыйынтыгында эки өлкөнүн бизнес-коомчулуктарынын кызматташтыгын кеңейтүү, жаңы ишкердик байланыштарды түзүү жана биргелешкен инвестициялык долбоорлорду ишке ашыруу боюнча макулдашууга жетишилди.
