Кыргызстандын БУУдагы демилгелери: мөңгүлөрдү сактоо, климаттын өзгөрүшү
Гкерманияда БУУнун Климаттын өзгөрүшү боюнча алкактык конвенциясынын Бонн процесси алкагында президенттин тоо күн тартиби боюнча атайын өкүлү Динара Кемелова баштаган Кыргызстандын делегациясы глобалдык климаттык сүйлөшүүлөрдө тоолуу өлкөлөрдүн кызыкчылыктарын илгерилетүү боюнча иштерге катышууда.
Президенттин расмий сайтында жарыяланган маалыматка ылайык, Кыргызстандын демилгеси менен “Тоолор жана климаттын өзгөрүшү боюнча эл аралык диалог” өткөрүлдү. Ага 30дан ашуун мамлекеттин өкүлдөрү, эл аралык уюмдар, жарандык коом, илимий чөйрө жана жергиликтүү жамааттар катышты.
Талкууда тоолуу аймактардын климаттык күн тартибинде өзгөчө ордун бекемдөө, мөңгүлөрдү сактоо, адаптация мүмкүнчүлүктөрүн кеңейтүү жана климаттык каржылоого жеткиликтүүлүктү жакшыртуу маселелери көтөрүлдү.
Кыргыз тарап тоо маселелерин системалуу түрдө калыбына келтирүү зарылдыгын белгилеп, тоолуу өлкөлөрдүн өзгөчө муктаждыктарына көңүл бурууга чакырды. Диалогдун жыйынтыктары COP31 конференциясында кароого сунуштала турган отчетко киргизилет.
Мындан тышкары, 10-июнда Андорра, Кыргызстан, Непал жана Бутан өлкөлөрү Тоо өнөктөштүгүнүн катчылыгы менен биргеликте “Тоолор жана климаттын өзгөрүшү маселелерин илгерилетүү” аттуу тематикалык иш-чара өткөрүштү. Анда SBSTA 64 диалогу, COP31ге даярдык жана кийинки кадамдар талкууланды.
Динара Кемелова Кыргызстандын тоолуу аймактардын климаттык туруктуулугун чыңдоо боюнча демилгелерин тааныштырып, атайын каржылык механизмдерди түзүү, климаттык карыз алмашуу инструменттерин өнүктүрүү жана адаптациялык программаларды кеңейтүү сунуштарын ортого салды.
Ошондой эле Кыргызстандын төрагалыгы астындагы Тоо тобу COP31дин төрагалыгы болгон Түркия жана Австралия менен консультацияларды өткөрүп, тоо күн тартибин илгерилетүү, климаттык каржылоону кеңейтүү маселелерин талкуулашты.
Кыргыз-Корея климаттык кызматташтык боюнча биргелешкен комитетинин биринчи жыйыны да өтүп, анда парник газдарын кыскартуу, кайра жаралуучу энергия, климаттык каржылоо жана туруктуу өнүгүү жаатындагы долбоорлор талкууланды.
Иш-чаралардын жүрүшүндө кыргыз делегациясы “Бишкек+25” Экинчи Глобалдык Тоо саммити тууралуу маалымат берип, бул демилге тоолуу өлкөлөрдүн туруктуу өнүгүүсү үчүн жаңы эл аралык диалог аянтчасы болорун белгиледи.
