Баткендин Чек айылында жаңы ичүүчү суу системасы курулууда
Ичүүчү суу менен камсыздоо департаменти тарабынан Баткен облусунун Чек айылында жаңы ичүүчү суу системасы курулууда. Долбоор аяктаса, 5 миңден ашуун тургун таза жана коопсуз суу менен камсыз болот. Бул тууралуу Айыл чаба министрлиги билдирди.
Маалымдалгандай, долбоор "Климаттын өзгөрүшүнө туруктуу суу чарба кызматтарын жакшыртуу" программасынын алкагында ишке ашууда. Учурдагы суу системасы 1972-жылы курулган. Анын эскиришинен улам калкты сапаттуу ичүүчү суу менен үзгүлтүксүз камсыз кылуу кыйынчылык жаратып келет.
Долбоордун алкагында ар биринин көлөмү 700 куб метр болгон эки таза суу сактоочу резервуар курулуп, 35 чакырымдан ашык суу түтүгү тартылат. Бул суу менен камсыздоонун ишенимдүүлүгүн жогорулатып, авариялык кырдаалдарды жана суунун коромжу болушун азайтууга мүмкүндүк берет.
Мындан тышкары, таза суу айылдагы эки орто мектепке, эки бала бакчага, фельдшердик-акушердик пунктка, маданият үйүнө, спорт залга, айыл өкмөтүнүн имаратына жана төрт мечитке жеткирилет.
Курулуш иштери 2026-жылдын июль айында башталган. Долбоорду 2028-жылдын биринчи кварталында аяктоо пландалууда.
