Төрөбаев дүйнөлүк корпорацияларды экономикалык кызматташтыкка чакырды
16-июнда Кытайдын Циндао шаарында өткөн трансулуттук корпорациялардын лидерлеринин VII саммитине президенттин өзгөчө тапшырмалар боюнча атайын өкүлү Бакыт Төрөбаев катышып, сөз сүйлөдү.
Өкмөттүн басма сөз кызматы билдиргендей, саммитке алдыңкы эл аралык компаниялардын жетекчилери, мамлекеттик органдардын өкүлдөрү жана бизнес чөйрөсүнүн өкүлдөрү катышты.
Өз сөзүндө Бакыт Төрөбаев Кыргызстан менен Кытайдын ортосундагы кызматташтык ар тараптуу стратегиялык өнөктөштүктүн алкагында ийгиликтүү өнүгүп жатканын белгиледи. Ал соода-экономикалык жана инвестициялык байланыштардын кеңейип жатканын айтып, 2025-жылдын жыйынтыгы боюнча эки өлкөнүн ортосундагы товар жүгүртүү 27 миллиард АКШ долларына жеткенин маалымдады.
Ошондой эле ал өлкөдө жүргүзүлүп жаткан экономикалык реформалар, өнөр жайды өнүктүрүү, инфраструктураны жаңылоо, энергетикалык коопсуздукту чыңдоо жана инвестициялык жагымдуулукту арттыруу боюнча көрүлүп жаткан иштер тууралуу маалымат берди.
Саммиттин катышуучуларына Кыргыз Республикасын 2030-жылга чейин өнүктүрүүнүн улуттук программасынын артыкчылыктуу багыттары сунушталып, транспорттук инфраструктура, энергетика, билим берүү жана саламаттыкты сактоо тармактарындагы келечектүү долбоорлор тааныштырылды.
Иш-чаранын жүрүшүндө темир жол тармагын өнүктүрүү, жашыл энергетика объектилерин куруу жана заманбап өндүрүштүк кубаттуулуктарды түзүү боюнча демилгелер катышуучулардын өзгөчө кызыгуусун жаратты.
