Адылбек Касымалиев Михаил Мишустин менен соода-экономикалык маселелерди талкуулады
Министрлер Кабинетинин төрагасы Адылбек Касымалиев менен Россия Федерациясынын премьер-министри Михаил Мишустин эки тараптуу жолугушуу өткөрүштү.
Президенттик админстрациянынын маалыматтык саясат бөлүмүнүн айтымында, жолугушуу "Иннопром" эл аралык өнөр жай көргөзмөсүнүн алкагында өттү. Министрлер Кабинетинин төрагасы Адылбек Касымалиев эки өлкө ортосунда жогорку деңгээлде активдүү саясий диалог жүргүзүлүп жатканын, соода-экономикалык жана аймактар аралык кызматташтык ырааттуу өнүгүп, масштабдуу биргелешкен долбоорлор ишке ашырылып жатканын белгилөө менен, стратегиялык өнөктөштүктү мындан ары чыңдоонун маанилүүлүгүн кошумчалады.
Жолугушуунун жүрүшүндө Министрлер Кабинетинин төрагасы Россия өкмөтүнүн төрагасы Михаил Мишустинди ушул жылдын август айында Чолпон-Ата шаарында өтө турган Евразия өкмөттөр аралык кеңешинин жыйынына катышуу үчүн Кыргызстанга келип кетүүгө чакырды. Алдыда боло турган Евразия өкмөттөр аралык кеңешинин жыйынынын алкагында Кыргыз-Россия экономикалык форуму, ошондой эле Кыргыз-Россия аймактар аралык конференциясы өткөрүлөт.
Өз кезегинде Россия өкмөтүнүн төрагасы Михаил Мишустин эки тараптуу кызматташтыкты тереңдетүү боюнча мындан аркы иштердин маанилүүлүгүн белгиледи.
Сүйлөшүүлөрдүн жүрүшүндө тараптар кыргыз-орус кызматташуусунун күн тартибиндеги бир катар актуалдуу маселелерди талкуулашты. Өзгөчө соода-экономикалык, ошондой эле отун-энергетика комплекси, транспорт, курулуш, билим берүү жана маданият тармагындагы кызматташууга көңүл бурулду.
